Utang Malaysia diatu satu trilion ringgit — Dr Mahathir

Cash. — DayakDaily.com file pic.// Photo: Pixabay

PUTRAJAYA, Mei 21: Utang menua Malaysia diatu udah satu trilion ringgit, ku Menteri Besai Tun Dr Mahathir Mohamad.

Ku iya, chara ke patut meseti diambi ngambika menua ulih mutarka penanggul nya.

Ku iya baru, maya iya agi nyadi menteri besai suba, menua Malaysia semina berutang urung RM300 bilion aja.

“Diatu utang kitai udah manggai ngelui ari satu trilion lalu kitai meseti mutarka penanggul tu,” ku iya bejaku ba gempuru ninting bulan pengereja pengawa ari baruh Opis Menteri Besai.

Dr Mahathir madahka mayuh ubah patut digaga tang iya pechaya nya ulih dipejalaika nengah bantu pengereja pengawa perintah.


“Kami pechaya kitai ulih mutarka pemar tu tang kami begunaka saup pengereja pengawa perintah ti efisyen sereta ulih dikearap awakka ulih nyapai ubah tu.

“Nyadi orang ti bejalaika pengawa, orang nya meseti ngeletakka undang – undang atas ari semua utai lalu pengawa ke dikereja meseti nyaup meresi ngambika Malaysia ulih ba jalai ti mulaika pemaik. Semua meseti besaup nyapai pekara tu,” ku iya.

Ku iya, bah ke patut agi dipansik tang agi kelalu tu deka mantaika nya.

Dr Mahathir dekaka bisi sukung penuh ari pengereja pengawa perintah ngambika ulih mulaika Malaysia ngagai jalai ke betul ba pengawa ngemanahka ekonomi menua.

“Kitai enda ngambi timpuh ke kelalu panjai ba atur mulaika pemaik ke menua ngambika menua kitai dipebasaka baru,” ku iya. — DayakDaily

Share this article!