Ukum dibuai ari sekula patut diserenih baru

Rohani meri penerang ba aum media kemari.

PUTRAJAYA: Ukum “dibuai ari sekula” ti diteritka ba nembiak ti balat ngereja penyalah kenyau bepuluh taun ke udah patut diperatika baru sekalika nya bisi pengasi, pia ku langgur penemu ti dibantaika Opis Menteri Pemansang Orang Indu, Ruang Bilik enggau Raban Bansa (KPWKM).

Menteri opis nya, Datuk Seri Rohani Karim madah, pansik nya beguna amat ngambika ukum bukai ulih diterit ba bala nembiak nya

“Lebuh sida dibuai ari sekula, nadai sesapa deka peduli ke sida.

“Nya alai sida majak enda dikeibuh ti ngujungka sida lalu malut diri ba oengawa ke enda patut dikereja ti ngujungka sida malutka diri ba penanggul rama,” ku iya.

Ketegal nya ku Rohani, sida deka berandau enggau Opis Menteri Pelajar berandauka baru ukum nya.


“Alternatif bukai dikena nyilih ukum nya nyengkaum ngengkah nembiak nya dalam kelas khas peralihan.

“Dia sida ulih dikemataka terit agi lalu kitai (KPWKM) ulih mantu sereta nyendiaka kaunselor ngambika berandau enggau bala nembiak ke bepenanggul tu ,” ku iya ba aum media sepenembu bejadika ‘Majlis Pelancaran Bulan Kaunseling Kebangsaan 2017’ ba opis menteri nya kemari.

Ku Rohani,langgur penemu nya udah dikenatai ngagai kabinet kena Hari Tiga nyin tadi lalu kabinet udah merintahka sebengkah tim ditumbuh dikena mutarka penanggul nya.

“Semua opis menteri ke bukai mega udah dipinta numbuhka program intervensi ngambika isu sosial ti bekaul enggau nembiak tu ulih diputar jampat ,” ku iya.