SHAH ALAM, Jun 30: Universiti Teknologi Mara (UiTM) nempa sejarah nyadi universiti perintah keterubah di menua tu ngaga sereta ngelancharka satelit nano keterubah iya nya UiTMSAT-1′ ke langit kemari.
UiTMSAT-1 dilanchar ke Stesen Angkasa Antarabansa (ISS) ngena roket kargo Space X Falcon 9 ari Stesen Soldadu Langit Cape Canaveral di Florida, Amerika Syarikat urung pukul 5.47 lemai jam menua tu.
Satelit nano baka kiub ngembuan pemesai 10 sentimeter digaga dua iku nembiak UiTM di Jepun iya nya Syazana Basyirah Mohamad Zaki enggau Muhammad Hasif Azami nengah kerejasama enggau Kyushu Institute of Technology (KyuTech) nengah program ‘Joint Global Multi-Nation (BIRDS-2)’.
Syazana Basyirah enggau Muhammad Hasif nembiak Fakulti Engineering Elektrik (FKE) ke benung nyambung belajar ba renggat Sarjana enggau PhD dalam bidang nya di Jepun.
Kelimpah nya, sama bisi enggau program nya lapan iku nembiak bukai ari Bhutan enggau Filipina ke ngaga satelit nano ke menua sida empu baka BHUTAN-1 enggau MAYA-1 (Filipina). — DayakDaily
