KUCHING, Sept 29: Tuduh Malaysia nanggung utang RM1.2 triliun nyadika dalih Pakatan Harapan (PH) nginsil projek pemansang di Sarawak, ku MP Santubong Datuk Seri Wan Junaidi Tuanku Jaafar.
Wan Junaidi ke kala mangku pengawa Menteri Pengeraja Asal enggau Rampa Menua ba maya Perintah Barisan Nasional (BN) pechaya utang menua diatu semina RM686 biliun, iya nya 50 peratus ari KDNK.
“Diatu, ditetapka sida (PH) utang menua manggai RM1.2 triliun lalu nya nyadika dalih enda ulih ngaga projek di Sarawak.
“Dulu suba, iya nya dalam timpuh 30 taun nyadi Menteri Besai, iya madah deka mantu Sarawak, tang diatu ni bagi bantu ke diberi.
“Nyentuk ngagai Datuk Seri Najib ke udah ngelawa Sarawak 61 kali kenyau ari taun 2009, mayuh projek dikemendar BN tang dikinsil PH,” ku Wan Junaidi ba siti pengawa di Kuching pagi tadi.
Beambika chunto Opis Menteri Pengeraja Asal enggau Rampa Menua ba maya Perintah BN, iya madah projek ba penyampau RM486 juta udah dikemendar digaga di Sarawak.
Ketegal tuduh menua nanggung utang ke besai nya ku Wan Junaidi, semua projek ke patut berengkah digaga ba taun 2018 enggau 2019 dikinsil.
“Mayuh projek opis menteri pengeraja asal enggau rampa menua dikemendar BN ba taun 2015, 2016 enggau 2017.
“Projek ba penyampau RM486 juta nya enda nyengkaum projek nyeliah ampuh bah di Kuching enggau Sibu ti begunaka belanja RM150 juta enggau RM100 juta,” ku iya.
Wan Junaidi nandu, projek ngenalam Sungai Buntal (RM7 juta) enggau Sungai Bako (RM7 juta) sereta projek di Muara Tebas ke beungkus RM25 juta ungkup pemaik orang berikan bela dikinsil.
Berindik enggau nya iya enda arapka jaku ketuai dalam PH ti deka mai pemansang ba Sarawak sereta mulaika hak nitihka Sempekat Malaysia 1963 (MA63).
“Ba jeman perintah ke dulu, raban tu mih ke nyadi Menteri Besai, Sapit Menteri Besai enggau Menteri Pekara Wang.
“Ba sentang ulah ngelanggar hak Sarawak bepelasarka MA63, anang nuduh pangan diri ketegal semua ketuai ba renggat federal maya nya sama magang,” ku Wan Junaidi.
Ngenang kaul ke sama, iya madahka diri udah nyadi MP BN keterubah ba taun 1993 mantah undang-undang ti diasai ngelaungka hak Sarawak.
“Ketegal ulah nya aku udah ditepu dalam ‘peti ais’ pengelama enam taun lalu enda ngasaika sebarang pengelebih nyadi MP,” tandu iya. — DayakDaily
