Tiga sampel ukui di Julau positif rabies

Dog snout. — DayakDaily.com file pic.// Photo: Pixabay

SARIKEI, Feb 5: Tiga sampel ari ukui di pelilih Julau udah ditukuka Opis Servis Veterinar positif rabies.

Ketuai Opis Pengerai Mensia Mayuh Opis Menterj Kaunsil Kandang Menua enggau Pengawa Berumah Sarawak Dr Cheong Yaw Liang madah, kes keterubah positif rabies bekaul enggau ukui ti ditangkap semak Sekula Sekondari (SMK) Julau No. 2 kena Dis 31, 2017.

Dua iti agi kes iya nya ba ukui ti bekedayau ba tisi jalai semak Rumah Paing, Km 19 Jalai Kelupu-Julau-Durin (KJD) enggau ba Jalai Julau/Entabai (urung dua kilometer ari Pasar Julau) kena Jan 8 nyin tadi.

Ku iya, naka ke diatu nadai udah bisi kes dirampit virus rabies ba mensia sldi pelilih nya.

Penulung Pemesai Veterinar, Opis Servis Veterinar Bagi Menua Sarikei Mathew Joan Sigai madah, sida udah nuchuk vaksinasi anti-Rabies ngagai ukui dalam kandang 10 kilometer radius ari ketiga-tiga ukui ke positif rabies nya.

“Diatu oengawa nuchuk vaksinasi ba ukui udah tembu dipejalai,” ku iya.

Bisi lima sampel ari bagi menua Sarikei dianjung ngagai makmal (Opis Servis Veterinar Ipoh) empai lama sereta agi nganti pemutus.

Iya mega madah, bisi 1,208 ukuk udah diuchuk vaksinasi anti-Rabies ba kandang menua Julau ke alai sebagi ari kandang menua nya ari baruh pegai Majlis Daerah Luar Bandar Sibu. — DayakDaily