Tebal agi peranak Malaysia ngembuan darah bansa O

Blood donation. — DayakDaily.com file pic. // Photo: Pixabay

KUALA LUMPUR, Jun 20: Pusat Darah Negara (PDN) ngerikodka 180,651 orang ti udah meri darah taun nyin kemari enti dibanding 180,052 iku orang ba taun 2016, pia ku Dr Noryati Abu Amin.

Ku iya madah, 82, 619 iku orang baru meri darah enti dibanding enggau 76,213 iku orang ba taun 2016 ti udah ngayanka penyampau ti positif dikena nangkup peminta guna orang sakit di semua sepital ari baruh Opis Menteri Pengerai di selampur menua.

“Di Malaysia, mayuh agi peranak ditu ngembuan darah O, ditangkan ke A enggau B lalu ke pemadu mimit iya nya darah AB.

“Bisi dua chara meri darah ke dipejalai PDN, iya nya meri darah komponen penuh tauka ‘whole blood’ iya nya ninting tiga bulan sekali, lalu siti agi meri darah ‘aferesis’ iya nya ngena sistem ngaga semaya dulu,” ku iya madah ngagai Bernama ditu bedau lama ke udah.

Iya madahka meri darah aferesis iya nya meri darah ngena chara komponen darah ke dikumbai plasma tauka platelet tauka kededua nya sekali, ke alai komponen darah ti enda diguna ditikalka baru ngagai tubuh orang ti meri darah nya.

Dr Noryati madah, peminta darah ari sepital di selampur menua nitihka pukul rata begunaka urung 2,000 unit beg sehari lalu peminta darah ungkup sepital di Lembah Klang iya nya urung 500 unit beg sehari.

Taja pia, ku iya, bekal darah deka nurun ari tikas likun iya nya baruh 3,000 beg darah sehari di selampur menua maya musim pengerami enggau kemisi sekula.

“PDN seruran nentuka stok darah chukup tetiap musim pengerami lalu deka chakah agi ngaga kimpin meri darah ba palan ti engkeman baka ba palan bebelika barang sereta mega ba masjid.

“Kelimpah ari nya, PDN mega deka terus ngadaka kerejasama enggau pengatur kimpin meri darah entara nya Gerempung Ex-Nembiak Maktab Rendah Sains Mara (Ansara), gerempung ukai dikuasa perintah (NGO), Prasarana Malaysia Bhd enggau Mass Rapid Transit Corporation (MRT Corp) Sdn Bhd,” ku iya.

Iya madahka peminta ungkup guna darah napi penambah nyerumba penyampau orang sakit ti nambah pemansang teknologi perubat enggau servis pengelandik ti diberi sepital ba selampur menua.

Beserimbai enggau nya, mensia mayuh dipinta meri darah sekalika ba PDN ba Jalai Tun Razak ditu tauka ba dini endur sepital perintah di selampur menua dikena nentuka bekal darah seruran chukup ninting maya, ku iya. — DayakDaily