Snowdan meri bantu SK Jaong, Pantu

Snowdan (dua ari kiba) nyuaka cek bantu ungkup PIBG Sk Jaong ke diterima Jeffrey.

KUCHING, 18 Nov: Menteri Muda Nembiak enggau Lumba Datuk Snowdan Lawan pagi tadi ngelawa SK Jaong, Pantu ti dituntung penusah angus malam tadi.

Ba penemuai nya, Snowdan ke mega ADUN Balai Ringin bisi meri bantu RM10,000 ngagai Gerempung Apai Indai enggau Nembiak (PIBG) SK Jaong.

Bantu nya diterima Sapit Chairman PIBG SK Jaong, Jeffrey Panas.

Kelimpah ari nya, Snowdan mega bisi meri RM1,000 ungkup tetiap pintu rumah ti tasah ketegal penusah.

Ba penusah nya, 8 blok kuarters pengajar sekula angus diempa api.


Snowdan (lima ari kiba) enggau raban ari opis perintah bukai datai ngesah penusah SK Jaong, Pantu.

Opis Bomba enggau Penyah Penusah (Bomba) Sri Aman nerima kangau telefon urung jam 7.30 malam alai pejalai nuju sekula nya ngambi timpuh sejam 17 minit iya nya 74km ari pasar Sri Aman.

Tekala Bomba datai ba palan penusah, siti blok lima pintu rumah udah ambis diempa api.

Api mega nyambar 2 iti blok pengajar ke bukai ti bisi 4 pintu rumah.

Semua 8 iku orang ke diau di kuarters nya selamat sereta nadai bakal.

Bela nyempulang Snowdan ngesah penusah SK Jaong, pemesai perintah ari Opis Pengelantang Pendiau enggau Opis Pelajar. — DayakDaily