Dikarang Chris Bishop
KUCHING, April 8: Penyampau 37 iku nembiak ari empat buah sekula di Kuching dipilih nerima skularship Kolej Reng seharitu.
Raban penerima tu diarika 10 iku nembiak ari SMK St Joseph, SMK St Mary (17), SMK St Thomas (5) enggau SMK St Teresa (5).
Skularship nya meri peluang ngagai sida nampung pelajar ba renggat ‘Diploma in Architectural Studies, Interior Architecture, Creative Design, Business Administration’ sereta Sijil Kemahiran Malaysia
Pengawa nyuaka skularship ke diatur di Auditorium SMK St Joseph Kuching dikemujur Menteri Pelajar, Sains enggau Pansik Teknologi Dato Sri Michael Manyin.
Manyin ba jaku iya rambau pengawa nya ngelalau bala nembiak ngambika enda meratka pekara akademik aja.
Ku iya, akademik patut disempulang enggau pengelandik kreatif sereta inovatif ngambika sida ulih besemekih maya ke gawa jemah.
Beambika chunto Singapura, Manyin madah polisi menua enda meransang bala pengajar kelalu mayuh ngajar ngambika bala nembiak belajar nyadi lebih kreatif sereta inovatif.
“Pia mega ba menua tunga barat, sida enda digaji bepelasarkan peninggi setipikit tang dibayar bepelasarkan pengawa ke dikereja.
“Berindik enggau nya bala nembiak sekula meseti berunding alai dunya diatu udah napi ubah. Diatu kita besemekih enggau semua orang ba dunya.
“Dunya nadai adan diatu begunaka pengelandik lalu ukai nya setipikit,” tandu Manyin.
Dulu agi ari nya, Presiden Kolej Reng Datuk Richard Eng madah kolej ngembuan juluk ngubah pengidup kominiti nengah pelajar.
Ku iya, kolej ke ditumbuh ba taun 2010 nya bela keran ngangkatka pengidup peranak asal Sarawak enggau Sabah.
“Lebih 100 iku peranak asal kelebih agi sida ke kurang penatai pemisi udah ngasaika bantu skularship ari Kolej Reng.
“Diatu kitai meri peluang ngagai nembiak Sarawak enggau Sabah,” ku Eng.
Bela datai Kepala Pengajar SMK St Joseph Hendry Chai. — DayakDaily
