Sikie: Anang pechaya penerang sentang pemedis pengudah betuchuk vaksin

Sikie nerima tuchuk vaksin Covid-19 di Bintulu Hari Enam tu tadi.

Follow and subscribe to DayakDaily on Telegram for faster news updates.


KUCHING, 7 Mac: Mensia mayuh kelebih agi ke diau ba Sitak Kunsil Negeri (Dun) Kakus dipinta ngambi enda mudah pechayaka penerang sentang pemedis pengudah betuchuk vaksin Covid-19 ke dikunsi ba media rama.

Nitihka Menteri Muda Undang-Undang enggau Adat Bumiputera Datuk John Sikie Tayai, jaku tuduh nya ukai semina enda ngena, tang mega meransang mensia mayuh ngambika enda nerima tuchuk vaksin.

“Aku udah betuchuk vaksin Covid-19 alai pengudah setengah jam, aku nadai ngasaika sebarang pemedis.

“Berindik enggau nya, aku ngelalau mensia mayuh ba sitak kunsil negeri Kakus enda rawan ngambi tuchuk vaksin Covid-19 tu.

“Anang pechayaka jaku tuduh ti madah vaksin nya tau ngenatai pemedis. Nya berita ti enda ngena,” ku iya nitihka riput Unit Komunikasi Awam Sarawak (UKAS) seharitu.

Sikie mansutka jaku nya ngagai pemberita pengudah nerima tuchuk vaksin ba Program Vaksinasi Covid-19 Pelilih Bintulu di Dewan Sri Kenyalang, UPM Kampus Bintulu kemari.

Tambah Sikie ke mega Adun Kakus, program nya pengudah tu deka diadu di Dewan Sukan Tatau ungkup orang ti udah nerima kangau ari Klinik Pengerai Tatau.

“Aku minta peranak ba kandang menua Tatau nerima tuchuk vaksin tu ngambi ulih ngintu pengerai diri, orang ke disayau sereta orang bukai ti sama enggau begulai,’ ku Sikie.

Bela datai Adun Samalaju Majang Renggie, Adun Tanjung Batu Chiew Chiu Sing enggau Chairman Komiti Pengintu Penusah Ngenyit Bintulu Jack Aman Luat. — DayakDaily