Sekula di Betong udah sedia dibuka – Uggah

Uggah (kanan) meresa sinki endur masu jari ba SMK Spaoh.

KUCHING, 6 Julai: Sekula di Pelilih Betong udah sedia nerima penatai nembiak alai sida deka nampung pelajar berengkah 15 Julai pengudah diketu ketegal pandemik Covid-19 ba bulan Mac tu tadi.

Sapit Kepala Menteri Datuk Amar Douglas Uggah Embas madah, semua sekula deka nitihka prosedur operasyen standard(SOP) ke ditetapkan Opis Menteri Pelajar.

“Sida(sekula) bisi nyendiakan sinki endur masu jari, nyendia pemunuh kuman, termometer sereta ngaga takah penyauh 1 meter entara mija ba dalam kelas,” ku iya ba penemuai kereja ngagai sekeda sekula di Pelilih Betong kemari.

Sekula ke dilawa iya nya SMK Spaoh, SK Spaoh, SK Suri Debak, Sk Gayau, SK St John enggau SK Paku Central.

Ba penemuai nya, Uggah bisi mendingka penerang ari pemesai sekula ba sentang pengawa ke udah diatur dikena nentuka sekula nitihka SOP.

Iya ke mega Chairman Komiti Penusah Ngenyit Negeri Sarawak (JPBNS) ngelalau tetiap sekula ngambika nyendia mayuh agi termometer.

Ku iya, perintah sedia meri bantu belanja ngagai tetiap sekula ungkup tuju nya.

Uggah madah bala pengajar diatu ngesan tanggungpengawa ‘frontliner’, iya nya nyeliah bala nembiak sekula ari sebarang penyakit.

“Tentuka SOP sereta jaku tangkan ari opis menteri pelajar enggau opis pengerai dititih belama,” ku Uggah.-DayakDaily

Share this article!