KUALA LUMPUR, Mei 17: Sekeda barang baka beg sandik, gari enggau tepa dirampas ari rumah ex-Menteri Besai Datuk Seri Najib Tun Razak ba Jalai Langgak Duta, Taman Duta ditu dinihari tadi.
Luyar Najib, Datuk Harpal Singh Grewal lebuh dikerandau lebuh ke pansut ari rumah nya urung pukul 4.20 dinihari tadi madah, nadai sebarang dokumen diambi.
Iya pechaya barang nya diambi awakka ditasat nitihka ‘Akta Pencegahan Pengubahan Wang Haram’ enggau ‘Pencegahan Pembiayaan Keganasan 2001’.
“Kami pechaya (pengawa ngiga) dipejalai nengah akta pengubahan wang,” ku iya, seraya madahka Najib enggau sida sebilik meri kerejasama sekumbang proses ngiga nya dipejalai lalu nadai sesapa bisi ditangkap maya nya.
Naka pukul 8 pagi tu, raban polis agi ba endur nya.
Lebih 10 buah entukar polis nyengkaum trak datai ba rumah Najib urung pukul 10.15 malam tadi pengudah iya pulai besembiang ari Masjid Kampung Baru.
Harpal madah, sebuah agi rumah endur Najib diau iya nya apartmen mewah di Jalai Raja Chulan bela dikeruga polis.
Polis dipeda mai pansut sekeda barang enggau kutak ke enda temu isi dalam operasi ke tembu urung pukul 3 dinihari.
Najib enggau bini iya Datin Seri Rosmah Mansor udah dirintai chelum Opis Imigresen ari ninggalka menua tu.
Hari Dua tu tadi, Menteri Besai Tun Dr Mahathir Mohamad madah iya melabaka tuduh deka ditinggang ngagai Najib berindik ari pengawa nasat ex- menteri besai nya salahguna beratus juta dolar Amerika ari wang turu 1Malaysia Development Berhad (1MDB).
Pakatan Harapan ti bechairmanka Dr Mahathir mujur numbangka Perintah Barisan Nasional ti betuaika Najib ba pengawa bepilih besai kena Mei 9 tu tadi. — DayakDaily
