Sebuah rumah panjai 81 pintu lengis angus di Bekelit, Sibuti

Lebih 400 iku nadai agi alai ngenduh pengudah sebuah rumah panjai 81 pintu nyengkaum beberapa rumah ngatika diri abis lengis angus diempa api.

MIRI, Oct 26: Lebih 400 iku nadai agi alai ngenduh pengudah sebuah rumah panjai 81 pintu nyengkaum beberapa rumah ngatika diri abis lengis angus diempa api.

Penusah nya nyadi urung jam 4.15 lemai di Bekelit, Sibuti.

Nitihka padah peranak rumah panjai nya, selumpung rumah panjai nya ari baruh pegai dua iku tuai rumah, iya nya Tr Jambai Jali enggau Tr Majang Ringkai.

Lebuh penusah nyadi, 71 iku raban bomba enggau tiga iku pegawai ari Balai Bomba Lopeng enggau Miri udah datai ngesah penusah nya ngena dua buah kerita pengerara api, sebuah EMRS, sebuah lori tangki ai enggau sebuah entukar 4WD udah bekau nerima kangau jam 4.16 lemai.

Api nya dipelabaka berengkah nyadi ba sepintu bilik rumah panjai nya.

Rumah panjai nya sepenyauh 75Km ari Bandaraya Miri.

Polis agi nasat kebuah penusah nya nyadi nyengkaum penyampau pengerugi ti ditanggung peranak rumah panjai nya. — DayakDaily