Sarawak enda nyerahka hak ba minyak enggau gis, enda mega nitihka PDA

Datuk Patinggi Abang Johari Tun Openg

KUCHING, Mei 16: Sarawak enda nyerahka hak ba minyak enggau gis ngagai Petroleum Nasional Berhad(Petronas) sereta enda mega nitihka Akta Pemansang Petroleum 1974 (PDA74).

Kepala Menteri Datuk Patinggi Abang Johari Tun Openg netapka Sarawak bisi hak nyaga aktiviti minyak enggau gis ari baruh Ordinan Ngelumbung Minyak 1958 (OMO58).

“Akta Pemansang Petroleum 1974 (PDA 1974) diteritka ba nengeri bukai di Malaysia. Tang ba Sarawak, kitai nitihka Ordinan Ngelumbung Minyak 1958 (OMO58).

“Baka ke suah dipadah aku, kitai bisi hak ba minyak enggau gis. Nya meh kebuah kitai mai pekara tu ke kort alai kort udah mutus kitai (Sarawak) bisi hak ba pekara tu,” ku Abang Johari.

Nimbal jaku tuduh bekait enggau bayar RM2 biliun Petronas ngagai Sarawak, Abang Johari madah ba maya ke diatu sebengkah pekara benung diperunding.


“Pekara nya meseti diatur komiti konsultatif ke baru ditumbuh perintah ke baru.

“Retinya, kitai meseti berandauka pekara tu dulu,’ku iya ba pengerami “Sumbangsih Raya-Gawai’ alai 10,500 iti kutak ruti bisi disuaka ngagai orang gawa baris mua maya penusah dituntung Covid-19.”

Ba minggu ke dulu, nengah siti penerang berita ke dikeluar Menteri Muda Undang-Undang, Kaul Negeri enggau Menua, Datuk Sharifah Hasidah Sayeed Aman Ghazali sereta chairman Petronas Datuk Ahmad Nizam Salleh, Perintah Sarawak enggau Petronas udah setujuka bayar 5 peratus SST ba produk petroleum ke dipansut ari Sarawak.

“Kedua-dua udah setuju diak chara mutar ke pemadu engkeman iya nya nengah chara dagang, negapka mayuh agi pengawa dagang enggau beranakka puku.

“Petronas nengah kompeni ke dibaruh iya deka mayar semua SST ke ditetapka Perintah Sarawak ba produk petroleum ungkup tahun 2019 ba penyampau RM2 biliun, iya nya 5 peratus SST ba atur nyual produk minyak enggau gis Sarawak,” ku penerang berita.

Nitihka penerang nya mega, Petronas deka terus dipebasa nyaga enggau ngatur pekara ke bekait enggau pemansang minyak enggau gis nitihka Konstitusyen Federal.— DayakDaily