SIBU, Nov 27: Kepala Menteri Datuk Patinggi Abang Johari Tun Openg kemari madahka negeri tu deka bisi stesen televisyen kediri.
Nya berindik ari pengasa ati iya enggau stesen televisyen peribit TV3 enggau Radio Televisyen Malaysia (RTM) ti jarang mantaika berita pasal Sarawak.
Iya bejaku munyi nya lebuh bejadi Aum Pengari Pampang PBB Nangka, Pelawan, Dudong, Bawang Assan dan Bukit Assek (Zon 10) di Hotel Kingwood, ditu kemari.
Ku Abang Johari, enti bisi stesen televisyen kediri, nya deka muka peluang ngagai pemekal drama enggau isi visual ari Sarawak enggau saintis sosial ngelakuka penyelai chara pengidup raban bansa di negeri tu.
Sarawak diatu ngembuan bungkur ke enda bebayar ari TV1, TV2 enggau TV3, lalu TV Al Hijrah badu mantai cherita enggau berita ke enda bebayar naka tengah bulan tu ketegal udah begempung enggau MyTV.
Diatu Sarawak semina bisi tv internet ti dikelala enggau nama TV Sarawak alai mantaika berita ari negeri tu, tang produksyen nya agi kelalu baru dikena matak ati rayat Sarawak, tambah mega bungkur internet mengkang enda serap di serata negeri. — DayakDaily
