Wong deka ngamatka semaya ngemanah jalai maya kimpin PRN ke sebedau tuin

SIBU, Nov 27: Projek ngemanah sereta melakin batang jalai nuju rumah peranak di tebing barat pasar Sibu dijangka tembu dalam bulan Januari 2018, pia ku Menteri Dagang Entarabansa Dato Sri Wong Soon Koh.

Projek ngaga jalai nya mungkur Sungai Sadit, Paradom, Sungai Bidut, Empawah enggau Engkilo ke alai semua pemanjai nya bisi 34 kilometer ke berengkah digaga dalam bulan April 2017.

Wong ke mega ADUN Bawang Assan madah, projek di Sungai Sadit enggau Empawah udah tembu 100 peratus.

Projek di endur bukai dalam Bawang Assan udah tembu urung 60 peratus nyentuk 95 peratus.

“Aku ngamatka semaya deka ngangkatmanah sereta melakin jalai ke.pemaik peranak ditu,”ku Wong.

Lebuh ke ngabas pengawa ngangkatmanah jalai di tebing barat Pasar Sibu, Wong madahka iya deka ngamatka semaya ti digaga maya kimpin Pengawa Bepilih Kunsil Negeri (PRN) ke sebedau tu ke alai iya deka ngangkatmanah sereta melakin jalai dalam sitak Bawang Assan.

Iya mega besemaya deka melakin jalai ba semua kandang menua ti diuan bansa Cina di DUN Bawang Assan. — DayakDaily