BETONG, Dis 21: Kerajaan bebendar meransang semua serak rayat regas ba lumba enggau main ngambika tubuh seruran gerai, pia ku Kaban Kunsil Negeri Saribas, Mohd Razi Sitam.
Ku iya, enti rayat enda ngemeranka gaya pengidup ti bepengerai sereta nyaga pemakai, tentu kitai mudah diinggap mayuh bengkah penyakit.
Ku Razi, nitihka statistik ari Opis Menteri Pengerai Malaysia (KKM), kenyau beberapa taun ke udah, majak mayuh rebak biak diinggap penyakit nyentuk nabanka nyawa sida.
“Penyakit nya tebal agi penyakit pemunuh lumur menua baka tungkul ati,darah tinggi, kemi manis, penyakit buah pinggang enggau ke bukai agi,” ku iya.
Iya mega madah, mayuh raban biak ke beumur 30-an udah ngidap penyakit baka semua penyakit nya datai ari pemakai ti enda seimbang enggau gaya pengidup ti enda bepengerai.
“Nya alai, kita patut meresa pengerai dikena nentuka kita semampai gerai sereta enda diinggap penyakit,” ku iya. — DayakDaily
