Polisi ngemendarka nembiak mai gajet ke sekula deka dipansik silik — Maszlee

Digital devices and data. — DayakDaily.com file pic. // Photo: Pixabay

IPOH, Julai 2: Opis Menteri Pelajar deka mansik silik perambu ngaga siti polisi ngemendarka nembiak mai gajet enggau rengka elektronik ke sekula dikena mantu proses ngajar enggau belajar (PDP) ke digaga perintah ke sebedau tu.

Menteri ke megai tanggung pengawa nya Dr Maszlee Malik madahka perambu nya meseti diperati silik nyengkaum meda ari sukut pengelikun sereta perengkaguna teknologi ke bisi.

“Opis Menteri nya ukai semina beratka gajet aja laban kontraktor (software) ke untung tang nembiak nadai bulih pemaik.

“Nya kebuah meseti dipeda nengah chara holistik enggau komprehensif,” ku iya madah ngagai pemberita pengudah Pengerami Begulai enggau Menteri Pelajar Sereta Nembiak Politeknik enggau Kolej Komuniti ke lalu Pra-ngelancharka Pengerami Ngintu Jubli Emas Politeknik Malaysia di Politeknik Ungku Omar (PUO) kemari.

Menteri Pelajar sebedau tu, Datuk Seri Mahdzir Khalid madahka perambu ngemendarka nembiak mai gajet enggau rengka perantik elektronik dibantai ngambika setipak enggau pemansang teknologi ke diatu.


Dulu ari nya lebuh ke bejaku, Maszlee madahka konsep oengaga ati, penyanyau sereta sama bebasa meseti dipasuk dalam sistem pelajar menua dikena nempa menua Malaysia nyadi menua maju sereta nyeliahka ari teparuk ngagai pekara konflik. — DayakDaily