Perintah negeri deka mantu SDNU ngaga Rumah Dayak di Sibu

Datuk Amar Douglas Uggah Embas

SIBU, Mei 28: Pengingin bansa Dayak ti bepuluh taun udah dekaka Rumah Dayak didiri di Sibu deka nyadi nyata pengudah nerima sambut ke manah ari perintah negeri.

Sapit Kepala Menteri Datuk Amar Douglas Uggah Embas, madahka perintah negeri deka meri sukung penuh ngagai Gerempung Bansa Dayak Sarawak (SDNU) di Sibu ngaga rumah Rumah Dayak nya.

“Perambu ngaga Rumah Dayak di Sibu udah lama dianti bansa Dayak ke nyau ari taun 1976-1977.

“Taja pia, nyentuk ke sehari tu lalu enda nyadi nyata. Nya kebuah, aku sedia mantu bansa Dayak di Sibu ditu ngaga Rumah Dayak ke lama udah dianti sida ngelama tu,” ku iya.

Iya bejaku munyi nya ba pengerami Makai Malam Mantar Gawai Dayak 2018 ke diatur ba Dewan Suarah Sibu kena Hari Enam tu tadi.

Uggah mega muji inisiatif SDNU Sibu ti meri insentif pelajar ngagai nembiak ke nyulut ba pelajar sida. Malam nya bisi 175 iku nembiak Dayak nerima insentif pelajar.

Kelimpah ari nya, Uggah mega ngungkupka RM10,000 ke wang turu insentif pelajar, RM30,000 ungkup komiti pengerami Makai Malam Mantar Pre Gawai Dayak 2018 lalu RM10,000 agi ngagai Kelab Gagong Sarawak.

Sama bisi ngagai pengerami nya, bini Uggah Datin Amar Doreen Mayang, ADUN Dudong Datuk Tiong Thai King, ADUN Nangka Dr Annuar Rapa’ee, sekretari politik kepala menteri Romeo Christopher Tegong enggau chairman SDNU Sibu Chambai Lindong. — DayakDaily