Rebak baru bansa Iban dipinta ngindu adat enggau daya pengidup asal

Datu Penguang Manggil

MARUDI, Mei 28: Menteri Muda Opis Kandang Menua, Datu Dr Penguang Manggil dekaka nembiak rebak baru bansa Iban regas ba pengawa ngintu, ngelaku sereta ngetanka adat enggau main asal sereta daya pengidup.

Dr Penguang, ke mega Kaban Kunsil Negeri Marudi, madahka bansa Iban meseti majak ngintu sereta nyaga pengaya peasaka asal enggau adat bansa ti majak lenyau ba dunya moden enggau teknologi.

“Penanggul ba pengelala daya pengidup asal majak ngirauka ati ba bansa Iban kelebih agi rebak baru udah ngemeranka chara menua bukai ti majak ngikis adat enggau daya pengidup bansa diri.

“Nya kebuah, patut amat kitai ngintu ada enggau main asal sereta daya pengidup laban nya sebagi ari identiti kitai,” ku iya lebuh bejadi Penumbuh Ke-21 Gerija Borneo Evangelical Mission (BEM) Beluru ditu ensana.

Ba pengerami nya, Dr Penguang bisi nyuaka Projek Mit Pemansang Menua Pesisir (MRP) RM20, 000 ngagai gerija nya.

Iya mega bisi nyuaka belanja ari perintah ngagai rumah pengarap bukai sepenyampau RM460,000 ari Unit Jalai Pengarap Bukai (Unifor) ke diterima tujuh pengari ari Sg Entulang All Saints Church, The Bishop of Miri, Gerija Pasar RC Pekan Lapok, Gerija Sg Laong (Rh Ngumbang Tia), Gerija Rh John Marikan Sg Buti, Gerija BEM Lepong Ajai Sg Liam enggau Gerija BEM Tanjung Rian. — DayakDaily