MIRI, Mei 27: Menteri Pengintu Pengelantang Pendiau Komuniti, Orang Indu, Ruang Bilik enggau Pemansang Nembiak Mit Datuk Sri Fatimah Abdullah madah, perintah negeri siru sereta deka mantu raban orang ti kurang benasit manah sereta seranta.
Bejaku ba Pengerami ‘Sejambak Kasih Hari Gawai enggau Aidilfitri’ di Hotel Dynasty, Fatimah madahka enda ngira bida ba jalai pengarap, bansa enggau jalai politik, sida mantu orang ke patut nerma nya.
Bisi 200 iku dipilih ari semua 3,510 penerima bantu pengelantang pendiau ari Miri, datai nerima bantu nya.
Di serata Sarawak, bisii 48,570 nerima bantu dikena ngerichahka pengerami Gawai enggau Aidilfitri taun tu.
Iya mega muji kerejasama enggau sukung Dynasty Hotel ti nyaup ngemujurka pengerami nya ninting taun.
Kelimpah nerima bantu duit RM100 enggau hamper ari JKM, penerima mega nerima hamper pemeri Hotel Dynasty. — DayakDaily
