KUALA LUMPUR, Julai 28: Perintah dipinta jampat mutarka isu peranak menua asal ke megai kad pengelala Diau Sementara (MyKas) enggau Diau Mendam (MyPR) di Sarawak.
Kaban Parlimen Puncak Borneo Willie Mongin madah, nyentuk ke diatu bisi urung 75,000 peranak asal Sarawak ke megai MyKas lalu 3,000 megai MyPR di serata negeri.
“Bisi sekeda sida nya diau di ulu entigis, nadai akses ke Opis Pengerejister Bansa sereta kurang penemu ari suba ngujungka sida laun ngerejister diri nyadi peranak menua.
“Nya kebuah sida nadai setipikit pengada enggah ke bukai ngujungka sida nyadi ukai peranak menua tauka megai MyKas enggau MyPR,” ku iya bejaku ba program interbiu Ruang Bicara Bernama News Channel (BNC) malam ensana.
Ku iya, ba sitak Puncak Borneo, 70 peratus ari nya kandang ulu entigis nyentuk ke garis entara menua enggau Indonesia, ke alai gaya ke baka nya meri pemar ngagai peranak dia nurun ke pasar ngaduka proses minta nyadi peranak menua.
Nengah awak nya iya mega mantaika langgur penemu ngambika perintah merekrut sereta ngelatih peranak menua Sarawak dikena nyendiaka sida mangku pengawa ke tinggi dalam opis enggau ejensi perintah, setipak enggau proses Borneonisasi baka ke ditulis dalam Sempekat Malaysia 1963.
“Taja pan kitai udah sedia meri pqngku pengawa ke tinggi ba opis enggau ejensi perintah ngagai peranak menua nya, tang enti ari sukut pengereja oengawa sida bedau sedia, lalu nya tau nyadi penanggul ,” ku iya. — DayakDaily
