Baru nerima manah pemutus KM deka nyali duit dikena ngemanah sekula repuk di Sarawak

Baru Bian

LAWAS, Julai 28: Menteri Kereja Raya Baru Bian nerima pemutus Kepala Menteri Datuk Patinggi Abang Johari Tun Openg ke deka meri duit jali RM1 bilion ngagai perintah besai dikena ngemanah sekula di negeri tu.

Baru, ke mega Kaban Parlimen Selangau sereta Kaban Kunsil Negeri Ba Kelalan, madah pekara nya ulih dikerandau silik agi.

“Pekara nya tau dikerandau silik agi ke pemaik rayat Sarawak,” ku iya madah ngagai media ditu, kemari.

Ku Baru, isu sekula repuk ukai baru lalu iya besemaya deka mai pekara nya ngagai Opis Menteri Pelajar.

“Pekara tu kebenar iya udah disebut bangkit dalam Dewan Kunsil Negeri tang Menteri Pelajar Sarawak madahka pekara nya ari baruh tanggungpengawa perintah besai,” ku iya.


Ke bendar iya, isu pelajar ari baruh tanggungpengawa perintah besai.

Isu sekula buruk di negeri tu angat disebut baru pengudah tragedi kuaters angus ti nabanka nyawa siku pengajar, Catherine Janet Tiwi, 25 di Sekula Primari Batu Bungan, Mulu – sekula di menua pesisir ke dalam kategori P3. — DayakDaily