Perang poster, menira majak angat ba sitak Parlimen Stampin

Menira BN enggau DAP ke diujak ba sepemanjai Jematan Batu Kawa.

Follow and subscribe to DayakDaily on Telegram for faster news updates.


KUCHING, April 30: Dalam kandang beberapa hari tu pengudah pengawa mantaika nama chalun kededua parti politik perintah enggau penyakal, pengawa ngelekatka poster enggau menira majak dipejalaika.

Tinjau pemberita DayakDaily, beratika bisi sekeda raban ari kededua parti nya ngereja pegawa ngelekatka poster enggau menira nyentuk ke jauh malam.

Baka kandang Batu Kawa enggau gelingi, menira enggau poster dipeda udah diujakka ba sepemanjai jalai nya berengkah ari Bt3 nyentuk ke simpang jalai Batu Kawa – Malihah lalu bia mega ba genturung berumah.


Baka nya mega ba Jematan Batu Kawa, menira BN enggau DAP dipeda diujakka sepemanjai sepiak kiba enggau kanan jematan nya.

Poster chalun DAP, Chong Chen Jen dilekat ba simpang api trafik Jalai Datuk Stephen Yong.
Poster besai dilekat semak enggau Palan Servis ADUN di Batu Kawah.

Nya ngelaika pengeran kededua parti ti sama deka ngambi ati pengundi lalu ngenampakka parti sida nengah poster enggau menira ke dilekatka sepemanjai jalai.

Sitak Parlimen Stampin siti sitak ti dipelaba angat diperebutka entara dua iku ketuai raban bansa Cina, iya nya presiden Parti Sa’Ati Rakyat Sarawak (SUPP) Datuk Dr. Sim Kui Hian nyatup chairman Demokratic Action Parti (DAP) Chong Chieng Jen ba Pengawa Bepilih Besai Ke14 (PRU14) tu.

Sitak Parlimen Stampin mungkur dua sitak Kunsil Negeri (DUN) iya nya Batu Kawa enggau Batu Kitang.

Ba Pengawa Bepilih Ke-13, sitak Parlimen Stampin mujur dikuasa DAP nengah chalun parti nya, Julian Tan Kok Ping.

Julian teulihka 41,663 undi enggau majoriti 18, 670 undi ngalahka chalun BN, Datuk Yong Khoon Seng ke bulih 22,993 undi lalu chalun STAR, Lina Soo semina bulih 239 undi. — DayakDaily