KUALA LUMPUR, Julai 17: Tun Dr Mahathir Mohammad madahka diri enda lantang ati ketegal buah runding iya ti deka ngadaka entukar nasional ti kedua baka ke enda nerima sambut.
Ku Menteri Besai nya madah, iya bisi nerima ripot iya nya nadai orang ti deka meda entukar nasional kedua nya dikemansang laban ba runding sida ‘udah chukup’ enggau Proton ke dipadahka mega enda mujur.
Ba sebana iya di blog, Dr Mahathir mafah enggau jaku sindir ‘kitai enda ulih tetangkupka pengawa dalam industri automotif’.
Rayat Malaysia, ku iya, sanggup agi meli entukar import nyengkaum ari China kelimpah ari milih entukar ke digaga menua Jepun lalu entukar ari Jerman ungkup sida ti bepenatai pemisi tinggi.
“Aku agi ingat entukar Jepun sepengudah perang kelia. Ko bala penguna, nyema kitai nurih enggau kukut, kitai deka meda tin Milo. Tang ari entukar tin Milo nya mih datai mayuh jenama entukar baka Toyota, Nissan enggau Suzuki ti dikena kiatai diatu.
“Udah tentu tu enda deka nyadi di Malaysisa. Entukar kitai endang digaga ari tin Milo belama-lama,” ku Dr Mahathir nerang seraya madahka perintah diatu nadai perambu ngaga entukar nasional kedua ungkup industri automotif ke diempu perintah.
Ku iya nandu, madahka sektor peribit di menua tu ulih ngaga ‘design’, nempa ngena tanah liat, lalu model ungkup diuji sereta mansutka enggau mayuh entukar.
“Tang tumu agi kitai udah enda setujuka perambu ngaga entukar nasional kedua, nya ti nekul semua perambu kitai ngemansutka entukar ungkup sida peribit. Nya ti ngayanka perintah nadai nadai industri automotif ungkup perintah menua tu empu,” ku Menteri Besai nya.
Dr Mahathir madah makit menua diatu mayuh agi ti bisi entukar import sekalika ti bisi kualiti ke manah, tauka bansa entukar ‘tin Milo’.
“Dipansutka kopeni besai, sida udah ngempu makit entukar menua Malaysia nyentukka udah ngalitka peluang Proton. Pengujung nya, Proton dijual ngagai orang menua luar. Nadai entukar nasional agi. Nadai industri automotif agi. Pengereja pengawa, injinir, raban pengatur pan nadai kereja agi. Semua nya surut.
“Malaysia nyadi menua penguna, menua nanam padi sereta menua berikan. Enda ngawa. Tu aja ti kedeka kitai lalu tu mih ti dikeulih kitai. Anang ngingatka agi ‘Wawasan 2020’,” ku Dr Mahathir. — DayakDaily
