210 laluh sekula repuk deka digaga ngena duit turu RM1 bilion

Datuk Seri Michael Manyin Jawong

KUCHING, Julai 17: Aum Dewan Kunsil Negeri Sarawak sehari tu dipadahka bisi 210 laluh sekula repuk di negeri tu deka digaga baru ngena duit turu khas RM1 bilion dalam timpuh dua taun ke deka datai.

Menteri Pelajar, Sains enggau Teknologi Sarawak Datuk Seri Michael Manyin Jawong madahka ungkup belanja nya dikemendarka dalam Bajet 2018 ke alai RM500 juta dipelanja ba taun 2018 lalu laluh nya ungkup 2019 kelimpah ti dikemendar dalam Atur Pemansang Malaysia Lumpar ke-11 (RMK-11) baka ti di udah disetuju Majlis Ekonomi Negara pada Okt 9, 2017.

“Taja pia, nyentuk ke sehari tu Opis Menteri Pelajar Malaysia udah meri kontrak nyeruri 116 sekula ke alai 50 digaga Opis Kereja Raya Sarawak lalu laluh digaga opis menterian nya empu ke alai semua ungkus nya bisi RM419.05 juta,” ku iya lebuh bejaku ba Aum Keterubah Dewan Kunsil Negeri Sarawak ke-18, ditu.

Ku iya, penyampau nya enda patut nyadi sebagi ari RM1 bilion ti dikemendarka nya.

Kelimpah ari nya ku iya, sekula ti dikemendarka nya mega nadai ba rintai sekula repuk ti kemerat ke ditetap perintah negeri, nya alai belanja RM500 juta nya enda setipak enggau pekara ti idah disetuju maya Majlis Ekonomi Negara. — DayakDaily