KUCHING, Jan 31: Pengawa ngaga garis entara baru Pengawa Bepilih Besai Negeri (PRN) beguna amat dikena nentuka tusun pengawa enggau pemansang ulih dipejalaika ngasi agi di Sarawak.
Yang di-Pertua Negeri Tun Pehin Sri Abdul Taib Mahmud madah, Sarawak tau berasai temegah laban ngembuan penyampau pengari ke pemadu mayuh dibanding enggau negeri-negeri bukai di Malaysia.
Ku iya, komposisi raban nya mega ari mayuh bengkah ari sukut penemu politik, etnik enggau strata.
“Pengawa nguna jaku asal dalam aum sebengkah pekara ke nyelai ti mandangka ulah bebatak asur sereta sama bebasaka jaku enggau daya pengidup peranak di Sarawak.
“Penuai Dewan tu dipandang nengah topik pekara ti dikejakuka ti mungkur semua ke nyebut sentang pekara di negeri, menua enggau global.
“Pengawa bejuraka penemu terus ngagai pemerat negeri ari sukut penegap politik, pemansang ekonomi enggau pengelantang rama pupu bansa di Sarawak,” ku iya lebuh bejaku bejadi Istiadat Gempuru Khas Aum Ketiga ke Penggal Kedua Dewan Kunsil Negeri (DUN) Ke-18 kemari.
Ku Taib, DUN Sarawak mega nyadj kelai penyerakup entara pupu bansa di negeri tu.
“Kaban iya ari pengari rayat ke dipilih ari pupu bansa enggau usul.
“Tu mandangka demokrasi sentiasa ti dikemeran manah di negeri tu ke negika aspirasi rayat,” ku iya.
Iya mega ngelalau rayat negeri tu ngambika enda alah runding laban sebarang oengawa ti nguji ngeruga penyerakup enggau pengelikun di negeri tu.
“Aku gaga ati meda pengawa perintah ti negapka agi penyerakup ke udah bisi ba rayat di negeri tu,” ku iya. — DayakDaily
