KUCHING, Okt 15: Ketuai Nembiak Parti Bansa Dayak Sarawak Baru (PBDSB), Rapelson Richard Hamit ngarapka bajet Malaysia taun 2019 peranak Sarawak baka bajet ke digaga Barisan Nasional (BN) ba taun 2018, ke alai nadai penambah ba ungkup belanja dikena mantu ngaga semua pemansang ngambika sebaka enggau di Semenanjung Malaysia.
PBDSB ngasapka Perintah Pakatan Harapan (PH) ke baru ditumbuh ulih nambahka ungkup belanja ke Negeri Sarawak laban Sarawak kaban kunsi Malaya enggau Sabah.
PBDSB mega ngarapka PH patut berunding meri belanja ungkup komuniti Dayak di Sarawak dalam Bajet 2019.
Bajet Perintah Besai PH deka dipejuraika Menteri Wang, Lim Guan Eng bulan baru, lalu PBDSB ngarapka nya nyeng belanja ke bisi diungkupka bansa Dayak lalu ngaku bansa Dayak nyadi rayat Malaysia, ke alai telah “Lain-lain” patut disilih enggau “Dayak” ba semua pom rasmi enggau ba Konstiusyen Perintah Besai.
Ba bajet 2018 ari baruh BN sebedau tu, perintah udah mandangka Sarawak meseti ‘besemekih’ ngulihka utai enggau 12 buah negeri ke bukai.
Nya kebuah, pengawa ngaku Sarawak nyadi sebuah menua dalam federasyen Malaysia, ke alai status hak ari baruh MA63 meseti diintu baka ke negeri asal, ngambika bulih agih ke sebaka ungkup pemansang.
“Perintah PH patut bisi meri ungkup geran khas ngagai Gerempung Ukai Dikuasa Perintah (NGO) Dayak tauka gerempung Dayak di Sarawak dikena negapka program komuniti. Ambika chunto, Pusat Kebudayaan Dayak Sarawak (PKDS) disukung Dayak Nation Institute, Terabai Kenyalang Heritage Association of Sarawak (TKHAS) enggau Dayak Economic Development Berhad (DEDB) ti merambu numbuhka Rumah Dayak tauka Dayak Economic Centre. Tu patut bisi nyadi sebagi ari Bajet Malaysia 2019 ngambi nisi dikena ngemansangka ekonomi Dayak baka ba pengawa dagang, SME,main asal enggau asil pengelandik jari sereta infrastruktur menua pesisir ti patut dikemeratka,” ku Rapelson.
“Tanah nyadi isu besai di Sarawak. Perintah ke diatu meseti mutarka isu tanah nya. Tanah Hak Adat Bansa Asal (NCR) meseti diberi surat pala tanah pengudah 55 taun nganti. Chara ke proaktif patut dikena. Dayak enda patut nadai negeri tauka tanah. Majlis Adat Istiadat Dayak enggau Kort Bumiputera patut disilih enggau Kort Dayak ke sebaka peninggi kuasa enggau Kort Sivil enggau Kort Syariah dikena ngeringka institusyen nya di Sarawak,” ku Rapelson.
Ke sekali tu, Dayak ngarapka ari baruh Perintah PH (2019) ti baru ditumbuh, patut enda dichiping ari sukut bajet, diberi pemansang ke sebaka ngagai semua rayat Sarawak ngambika Negeri Sarawak ulih sama mansang sebaka enggau negeri di Semenanjung sereta Isu komuniti Dayak kelebih agi di menua pesisir ti mengkang “bedau nyadi peranak menua” enggau isu pelajar pengudah 55 taun dalam Malaysia,” ku Rapelson.
“Putrajaya mutar lalu ngintu MA63 ngagai ke asal nengah chara nudukka status Sarawak nyadi sebuah Menua, begintir nyadi Menteri Besai (entara Malaya, Sabah enggau Sarawak) ti nyadi kaban kunsi ke sebaka kuasa, ngetanka hak autonomi minyak enggau gis Sarawak, beri bajet ke meruan ngagai pemansang IT enggau internet di serata menua pesisir Sarawak, Mobil JPN di menua pesisir dikena mutarka isu nadai dokumen pengelala nyengkaum sekeda isu bukai ti tinggal sereta enda diputarka perintah BN ti patut diputarka Perinrah Pakatan Harwpan (PH),” ku iya.
Perintah Sarawak enggau rayat Sarawak mega anang enda ngaga pengawa ke patut dikena ngenanka hak autonomi baka ke dalam MA63. — DayakDaily
