KUCHING: Parti Bansa Dayak Sarawak Baru (PBDS Baru) nengah sebengkah penerang berita nyemetak minta Sapit Kepala Menteri Datuk Amar Douglas Uggah Embas jampat agi meri pemutus bekaul isu Tanah Adat Bansa Asal (NCR).
Presiden PBDS Baru Cobbold John madah, Uggah enda kala meri jaku pemutus sereta ngeletak sebarang timpuh ninting kali mansutka penerang berita. Uggah semina madah pekara tanah NCR deka diputarka.
“Uggah enggau Kabinet Barisan Nasional Nengeri Sarawak baka ti enda ibuh ke penanggul ti bekaul enggau Tanah Adat Bansa Asal, lalu semina beila-ila ngaga pemutus ba Pemakai Menua (PM) enggau Pulau Galau (PG),” ku Cobbold.
Iya mega madah, Uggah berupai amat kurang bekuasa taja pan nyadi Menteri Tanah Adat, laban ti deka ngelempaika pekara tu ba Kepala Menteri. Ba penemu Cobbold, pekara ti patut dikereja Uggah iya nya bejuraika pekara tu ba Kunsil Nengeri lalu ukai nuju Kepala Menteri.
“Ubah undang – undang semina nengah kabinet nengeri lalu ukai ba penemu pemutus siku Kepala Menteri. Pekara tanah tu serius, nya alai minta Uggah enggau Abang Jo enda belalai ke pekara tu”, ku Cobbold.
Berindik ari nya, Cobbold mega madahka diri enda lantang ati mandingka penyampau kes tanah ba kort diatu ti bedau teputar. Iya mega madah, pengawa ngelubahka pemutus ba pekara tu semina dikena perintah meri mayuh agi PL ngagai kompeni.
