KUCHING, 20 Okt: Parti Bansa Dayak Sarawak Baru (PBDSB) deka ngatur Aum Besai Ninting Taun (AGM) ba Kapit kena 31 Oktober 2020.
Sekretari Besai PBDSB Julius Enchana madah, beserimbai enggau nya mega parti deka ngaga aum kunsil besai.
“Aum tu deka digulu semua pampang ke udah ditumbuh lalu dipelaba deka digulu lebih ari 100 iku diligit,” ku iya nengah surat penerang berita seharitu.
Ba pengawa nya mega, Julius madah parti deka bejadi pampang Kapit sereta sub-pampang baka Bukit Goram, Pelagus, Katibas, Hulu Rajang enggau sitak tengah Sarawak.
Julius nambah, tiga iku pengari besai dalam parti iya nya presiden Bobby William, sapit presiden Mejar (B) Moses Ripai enggau chairman mendam Mengga Mikui deka ngatur pengawa Sandau Hari ba maya nya.
“PBDS Baru mega deka ngatur pengawa miring tanda meri terima kasih ke parti tu udah diidupka baru.
“Parti tu bisi penyelai ketegal suah udah dikinsil kenyau ari pun penumbuh ba taun 1983 suba.
“Nyentukka diatu, parti udah tiga kali dikinsil lalu empat kali diidupka baru”, tandu Julius. — DayakDaily
