PUTRAJAYA, Jun 28: Opis Menteri Pengerai udah ngambi atur nyaga sereta ngemataka chap sardin ari China ke diripot ngembuan ulat, ku Ketuai Direktor Opis Pengerai Datuk Dr Noor Hisham Abdullah.
Ku iya, nadai bisi sakit pengudah teempaka sardin nya.
“Nadai orang bisi sakit tauka pedis. Ulat dalam sardin nya udah mati lalu ukau ulat idup,” ku iya madah ngagai pemberita pengudah aum media pascakabinet Menteri Pengerai Dr Dzulkefly Ahmad ba Opis Menteri Pengerai, kemari.
Opis Servis Kuarantin enggau Meresa Malaysia (MAQIS) dipadah nemu ulat ti tau mai penyakit anisakiasis ngagai mensia dalam sampel tin sardin ari China ke dibai tama nengah North Butterworth Container Terminal (NBCT) Pulau Pinang kena Mei 14 suba.
Ketuai Direktor MAQIS Datuk Mokhtarud-din Husain madahka ulat nya ditemu nengah peresa fizikal enggau sampel ba beberapa tin sardin ke datai dalam dua kontena ti berisi ‘Canned Mackerel in Tomato Sauce’ chap RANESA ke ditan ba NBCT enggau anggar pemerat 36,720 kilogram sereta beungkus RM199,797.24. — DayakDaily
