Pampang Indu PBB deka nemuai meri basa ngagai TPM

Dato Sri Fatimah Abdullah

KUCHING, Jun 28: Pampang Indu Parti Pesaka Bumiputera Bersatu (PBB) Sarawak merambu deka nemuai meri basa ngagai Sapit Menteri Besai, Datuk Seri Wan Azizah Wan Ismail sereta ngenataika pengaga ati seraya berandauka pekara pemansang orang indu di negeri tu.

Chairwomen pampang nya, Datuk Seri Fatimah Abdullah madahka randau nya ila mungkur pekara perengkaguna enggau utai ke diguna maya ke diatu di Sarawak, ku iya.

Dibanding negeri bukai dalam Malaysia, Sarawak agi jauh tinggal ari sukut perengkaguna baka jalai alun, ai beresi enggau bekal elektrik nyengkaum Internet.

“Nya kebuah, kita begunaka kerejasama semua kelebih agi Perintah Besai matak negeri pansut ari penyeranta.

“Di menua pesisir Sarawak, agi mayuh genturung pendiau tauka rumah panjai ke ngembuan gaya pengidup ke seranta lalu nadai jalai alun, bekal elektrik enggau ai.”

Nyadi perintah baik nya ba renggat negeri tauka perintah besai, ku iya, kedua-dua deka terus ngangkatka pengelantang pendiau rayat menua pesisir belama.

“Pampang tu (Indu PBB/GPS) deka nentuka Sarawak majakka kaul manah enggau perintah besai taja pan menua kitai diatu baru bisi perintah ke baru,” ku iya. — DayakDaily