Operasi SAR ngiga dua iku pekereja kapal tungkang karam di Nanga Buan diketuka

Anggota bomba melakukan operasi pencarian untuk dua mangsa yang hilang.

KAPIT, Feb 6: Tim ngiga enggau nyelamat (SAR) ngetuka pengawa ngiga dua iku pekereja tungkang ti dipelaba lemas ditaban kapal sida ke karam di Nanga Buan pengudah tujuh hari ngiga lalu nadai tetemuka kelai endur seduai nya.

Penulung Pengarah Operasi Bomba enggau Penyelamat Negeri, Tiong Ling Hii madah, randau tim SAR begulai enggau Opis Bomba enggau Penyelamat, Polis Diraja Malaysia, Lembaga Sungai Sarawak sereta pengempu kapal udah diatur, ke alai sida udah ngaga pemutus ngetuka operasi nya sementara nyentuk ke kapal nya diangkat pengempu kapal.

“Operasi ensana diketu pukul 1.30 ngalih hari,” ku iya kemari.

Bisi lima iku semua pekereja kapal tungkang ngundan batu nya ditaban kapal nya karam tang dua iku ari nya Abhishek Kiran Jamdade, 20 taun enggau Kaishna Radheshayam Badai, 28 taun, kedua-dua seduai nya peranak India, lalu nadai temu naka sehari tu.

Minggu nyin tadi, Balai Bomba enggau Penyelamat Kapit udah nerima kangau ngenyit ari Balai Polis Kapit bekaul enggau sebuah kapal tungkang karam di Nanga Buan, Batang Rajang.


“Sebuah bot ke mai lima iku kaban Bombq lalu dianjung ngagai palan penusah ke nyadi ngambi bejalaika operasi SAR, ditangkan beberapa tim penyelamat ke bukai.

“Lima pekereja bukai selamat laban sempat nyemerai ke tebing sungai,” ku iya. — DayakDaily