KUALA LUMPUR: Penemu mensia mayuh bekaul enggau pemesai reti ngerejista diri nyadi pengundi agi baruh, taja pan Komiti Pengawa Bepilih (SPR) udah bejalaika mayuh bengkah chara dikena nambahka penyampau pengundi berejista di serata menua.
Chairman SPR Tan Sri Mohd Hashim Abdullah madahka mensia mayuh kelebih ari rebak biak meri mayuh macham dalih ngambika enda ngerejista diri nyadi pengundi, nyengkaum enggai malutka diri ba politik laban sida nganggap pengawa bepilih semina bekaul enggau parti politik, tang ke benar ngundi endang udah tanggungpengawa dikena ngemeranka demokrasi di Malaysia.
“SPR nengah Akademi Pengawa Bepilih ti dilanchar ba taun 2007, deka majakka batang tuju nambahka penemu ba mensia mayuh sentang pemesai reti pengawa bepilih,” ku iya lebuh nyadi temuai ba program ‘Ruang Bicara’ Bernama News Channel (BNC) di Wisma Bernama, ditu empai lama udah.
Ku Mohd Hashim, SPR nadai netapka atur ke alai sesiku individu nya enda tau enda ngerejista diri nyadi pengundi baka ti dikemeran ba sekeda menua bukai, laban pekara nya begunaka ubah ba undang-undang enggau konstitusyen ngambi ulih dipejalaika.
“Kelimpah ngerejista sesiku nya nyadi pengundi, SPR nyemetak madahka sida nadai kaul enggau sebarang parti politik di Malaysia, laban tanggungpengawa SPR semina nentuka pejalai enggau atur pengawa bepilih lanchar. Jaku tuduh ti madahka SPR berat sepiak nya enda amat” ku iya.
