BINTULU, Jan 8: Pampang Nembiak Parti Demoraktik Progresif (PDP) udah sedia napi Pengawa Bepilih Besai Ke-14 (PRU14) ke dijangka deka diatur sebarang maya taun tu.
Ketuai Nembiak PDP Kaunselor Robert Ayu ngansak semua kaban parti beserakup napi PRU14 taja pan ngembuan penemu ke bebida enggau pengingin diri.
Ku iya, kaban parti mega patut semampai bediri tegap mantu bala chalun Barisan Nasional (BN) dikena nentuka pemujur ulih dijapai ba PRU14 ila.
Ku iya, PDP udah magi sepenyampau 30 iku kaban exco ngagai empat sitak Parlimen PDP baka di Mas Gading, Saratok, Bintulu enggau Baram.
“Kami nganti perintah ngarak raban pengawa bepilih ba renggat nembiak redak mantu chalun BN sereta pechaya PDP ulih menang ba keempat-empat kerusi ke diberika ngagai PDP,” ku iya.
Ku iya baru, sida deka semampai majak nyukung lalu bediri tegap sereta arapka presiden Datuk Seri Tiong King Sing ngiring PDP ngagai tikas ke tinggi agi. — DayakDaily
