MWKS mantah keras kes nyerang mesjid di Christchurch, nagih dunya begempung mutarka isu tu

Fatimah (duduk dua kiba) enggau kaban MWKS mantah keras ulah raban extrimis ti udah nyerang mesjid di Christchurch, New Zealand. Bela dipeda Ngenang (kiba) enggau Rosey (dua kanan).

Chris Bishop

KUCHING, Mac 18: Gempung Orang Indu enggau Ruang Bilik Sarawak(MWKS) mantah keras ulah raban extrimis agama ti udah nyerang 2 iti mesjid di Christchurch, New Zealand kena Hari Lima tu tadi.

Chairman MWKS Dato Sri Fatimah Abdullah madah ulah nyerang mesjid dikereja raban extrimis lalu nyata nyadi ketegal diasut runding Islamophobia.

“Isu tu meseti dipejurai enggau nenak nyemaka isu nasyenalisma extrimis ti ngembuan runding ke jai ba peranak ari menua bukai enggau sebarang ideologi ti ngasut ngambika kitai begedika pangan diri,” ku iya.

Fatimah mansutka jaku tu ba aum pengarang berita pengudah bejadi ‘Forum Keharmonian’ di Palan Penerang Islam Sarawak (SIIC) ditu, seharitu.


Iya ke mega Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit ngelalau semua raban ketuai di serata dunya baka ke orang politik, ketuai komuniti enggau mensia mayuh begempung mutarka isu tu.

Ku iya, ulah begedika agama Islam tauka agama bukai patut diseliah lalu ulah raban extrimis ti udah ngereja penyalah nya meseti diketu.

“Nadai bansa enggau agama di dunya tu dikenangika kitai lalu pia mega nadai sekula, rumah tauka palan gawa ngajar ulah jai baka nya.

“Semua patut likun, kitai besembiang enggau lantang sekalika di mesjid, gerija, rumah sembiang agama bukai tauka di rumah diri empu,” ku iya.

Fatimah nambah tu meh maya semua rayat enggau agama di dunya begempung lalu bebendar ngetuka ulah jai nya sereta diganti enggau pemereti sereta basa begulai enggau pangan diri.

MWKS ti diarika bemacham bansa, agama enggau gaya pengidup ke bebida ku Fatimah deka bediri tegap nyukung semua rayat New Zealand kelebih agi di Christchurch enggau perintah menua nya.

“Ditu di Sarawak, kitai ngembuan sejarah ti temegahka semua etnik enggau agama ti udah ulih begulai manah enggau pangan diri, tang pengelantang tu patut enda diambi mudah.

“Kitai meseti regas ngatur aktiviti antara agama ngambi ulih ngangkatka pemereti enggau ngerapit kaul ke udah lama digenggam manah,” ku Fatimah nandu.

Ba penusah Hari Lima nya, dua mesjid di Christchurch diserang raban extrimis ti sengapa nimbak raban Islam ke benung sembiang.

Penusah nya ngujungka 50 iku mati naka ke diatu lalu bepuluh iku agi bakal nyengkaum sekeda peranak Malaysia.

Bela ngulu aum pengarang berita nya Sapit Chairman MWKS Rosey Yunus enggau Direktor Unit Pekara Agama Bukai(Unifor) Datu Dr Ngenang Jangu. — DayakDaily