Dikarang Chris Bishop
KUCHING, Mac 26: Malaysia deka nyadi menua tuai manggai ba taun 2030, ku Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Seri Fatimah Abdullah.
Beambika chunto Jepun ke udah ba ikas nya, Fatimah madah penyampau tubuh orang tuai ngelui ari nembiak di menua nya.
“Ba taun 2030, kitai ditu deka manggai ba ikas menua tuai alai 60 peratus peranak Malaysia beumur ngelui 60 taun.
“Reti nya enda lama agi, iya nya dalam timpuh 10 taun Malaysia nyadi menua tuai,”ku Fatimah.
Iya mansutka jaku nya ba aum pengarang berita pengudah nerima penemuai basa raban ari Gerempung Gerontologi enggau Geriatrics Sarawak di Begunan Baitul Makmur seharitu.
Ba maya nya ila ku Fatimah nambah, kitai deka meda mayuh agi orang tuai ari sida ke biak alai nya meh gaya pendiau menua tuai.
Berindik enggau nya iya muji pengawa ke dikereja Gerempung Gerontologi enggau Geriatics Sarawak ti ti keran nerenak pemereti ngintu pemaik orang tuai.
Ku iya, perintah bela meretika tanggungpengawa nya ti seraris enggau polisi ‘warga emas menua’.
“Sekalika udah sedia tauka enda, kitai meseti nyikap diri diatu,”ku Fatimah.
Penemuai gerempung nya diuluka presiden Dennis Tan. – DayakDaily
