JSJN Sarawak terus chakah matau isu dadah

Mohmad (dua kiba) nyuaka setipikit basa ngagai siku penerima ba penemuai kereja di IPK Sarawak seharitu. Bela dipeda Azman (kiba) enggau Razak (kanan).

Dikarang Chris Bishop

KUCHING, April 1: Bagi Tasat Jenayah Narkotik (JSJN) Sarawak nempa pemujur ba pengawa ngelaban keruga dadah ba taun 2018.

Direktor JSJN Bukit Aman, CP Dato Sri Mohmad Salleh madah pemujur nya bepelasarka pemayuh kes tangkap ke udah digaga enti dibandingka enggau 2017.

Berindik enggau nya, iya ngansak raban polis Sarawak ngenanka momentum nya ba taun 2019.

“Ba taun 2018, JSJN Sarawak mandangka pemujur enti dibandingka enggau 2017 lalu aku ngarapka momentum tu dinanka ba 2019.


“Pemujur tu dikira ari genap sukut, baikka ari penyampau kes orang ke ditangkap ketegal penyalah nyual dadah, ngembuan dadah, makai dadah enggau kes reta ke dirampas ari asil nyual dadah,” ku iya.

Mohmad mansutka penerang ba aum pengarang berita ke diatur di Mess Pegawai Kanan, Indu Opis Kontinjen(IPK) Sarawak seharitu.

Ngenang kaul ke sama, iya ngelalau raban polis ngambika seruran besedia ketegal isu dadah tu sigi enda abis.

Ninting hari ku Mohmad, isu dadah makin nambah ketegal ti bisi pemekal enggau pemeli.

“Penanggul dadah tu enda ulih diputarkan abis, seagi bisi pemekal enggau pemeli. Ketegal nya kitai meseti ngenanka momentum ba taun 2019 tu,” ku iya.

Mohmad (kanan) ba aum pengarang berita di IPK Sarawak di Kuching seharitu.

Nitihka statistik ke dikeluar JSJN Sarawak, kes tangkap ba semua kategori ungkup timpuh bulan Januari nyentuk ngagai Mac 2019 bisi nambah enti dibandingka enggau timpuh ke sama ba 2018.

Ungkup kategori pemekal dadah, kes tangkap nambah 56 peratus iya nya ari 157 kes ba taun 2018 ngagai 245 ba taun 2019.

Statistik mega mandangka kes tangkap nengah Seksyen 39B Akta Dadah Berbahaya 1952 ba timpuh ke sama nambah 42 peratus iya nya 42 kes ba 2019 alai 2018 ngerikut 25 kes.

Ba kategori penyalah ngembuan dadah, 555 kes tangkap dirikut ba taun 2019 enti dibandingka enggau 405 kes ba 2018 alai kes tu nambah 37 peratus.

Statistik nya mega ngerikut 17 kes tangkap nengah Akta Dadah Berbahaya(LLPK)1985 ungkup tiga bulan keterubah 2019 . Kes nambah 112 peratus enti dibandingka enggau semina 8 kes tangkap ba 2018.

Bela datai ngulu aum pengarang berita, Ketuai Polis Sarawak, CP Dato Azman Yusof enggau Sapit Direktor JSJN Bukit Aman SAC Dato Abdul Razak Md Zin. — DayakDaily