KUALA LUMPUR, Jan 2: Sepenyampau 21,613 saman udah dikeluarka Opis Perengka Pengangkut Jalai (JPJ) ketegal mayuh bengkah penyalah dalam ‘Ops Patuh’ ti dipejalaika di serata menua ari timpuh bulan Januari nyentuk Dis 30, 2017.
Sapit Kepala Pengarah (Operasi) JPJ, Datuk Wan Ahmad Uzir Wan Sulaiman madah, saman nya bekaul enggau penyalah baka lisin entukar (LKM) mati timpuh, ngelih ba garis begembar, deriba ba lurung ungkup bisi nyadi penusah ngenyit, ngelih baris kerita enggau nguna telefon binching maya deriba.
Ku iya, dalam timpuh ke sama 42,478 kerita udah diperesa lalu lebih 28,000 notis dikeluarka ejensi penerit adat nya kelimpah ari 72 buah kerita udah ditanka.
“Tebal agi kerita ti ditan nya dideriba peranak ari nenua bukai lalu tebal agi sida tu nadai lisin deriba.
“Kelimpah ari nya, notis mega dikeluarka ungkup pengempu kerita ngambika mai kerita sida diperesa penyelul cheremin,” ku iya lebuh dikerandau pemberita maya Ops Patuh di Jalai Bangsar tumu pagi kemari.
Berebak enggau nya, Pengarah JPJ Wilayah Persekutuan Kuala Lumpur Ismail Mohd Zawawi madahka dalam Ops Patuh nya, 2,896 kerita diperesa dalam operasi di Jalai Bangsar enggau Jalai Genting Klang.
Ku iya, 724 notis dikeluarka ketegal bemacham penyalah ngagai pengempu kerita dalam operasi ke berengkah ari jam 8.30 malam dereta tembu jam 1 pagi nya. — DayakDaily
