KUCHING, Ogos 21: Portal Opis Rampa Menua JAS naka pukul 11 pagi tu madahka Kuching ngerikod Indeks Pengamah Angin (IPU) jelan iya pemanah, nurun ari indeks angin kamah ba ikas 102 maya pukul 5 lemai kemari.
Ba 11 agi kandang endur di Sarawak ngerikod bacha IPU ke jelan iya pemanah baka Samarahan (89), Sri Aman (65), Sarikei (84), Mukah (80), Sibu (68), Miri (69), Bintulu (65), Samalaju (63), Limbang (54) enggau Kapit (56).
Dibanding enggau selampur menua, Kuching agi mandangka bacha IPU ke tinggi naka ke diatu ke alai kena pagi kemari udah mandangka bacha ti enda manah iya nya 107.
Bacha IPU 0-50: manah, 51-100: jelan pemanah, 101-200: kamah, 201-300: kelalu balat kamah lalu 300>: ngeruga pengerai.
Mensia mayuh kelebih agi orang tuai enggau ke bepenyakit kronik baka asma, pesakit bekaul enggau enseput dilalau ngurangka aktiviti luar bilik ba kandang endur ti balat sebun asap.
Jendila enggau pintu rumah mega patut ditutup dikena nyeliahka pengamah ari sebun asap sereta nentuka sistem angin dalam rumah manah sereta beresi.
Enti di luar, mensia mayuh dilalau ngena “masker” penutup idung enggah mulut sereta ngirup mayuh ai amat. — DayakDaily
