Rega ai irup ke dijual di kedai kopi deka diserenih baru

Chong Chieng Jen

SIBU, Ogos 21: Opis Menteri Dagang Dalam Negeri enggau Pejara Bebeli Barang (KPDNHEP) deka ngumpul penerang rega enggau saiz ai irup ti dijual di kedai kopi di Sarawak ngambika ulih nentu rega ke pemadu manah sereta enda nating rayat.

Sapit Menteri nya Chong Chieng Jen madah, opis pampang KPDNHEP di negeri nya udah dipinta ngumpul penerang ari kedai kopi ke beroperasi di Sarawak dalam timpuh seminggu dua.

Bejaku ngagai pemberita pengudah dialog enggau raban Gerempung Pengempu Kedai Kopi enggau Restoran Sibu di opis KPDNHEP Pampang Sibu, pekara nya dipejalaika berindik ari sekeda sebana ke diterima bekaul enggau mayuh bengkah rega enggau saiz ai irup ti dijual di kedai kopi di Sarawak diatu.

“Semua penerang ke digumpul nya ila deka diserenih lalu dibanding dikena nentu sekalika perambu ari raban gerempung nya ti deka nyemaka tauka numbuhka rega siling ulih dipejalaika, taja pan pansik silik deka digaga ba renggat opis menteri sebedau dipejalaika,” ku iya.

Berebak enggau nya, iya minta pengempu kedai kopi di Sarawak anang nyual ai irup kelalu mar nyentukka nating rayat kelebih agi raban B40.


Berebak enggau program dialog nya, Chong puas ati enggau input ke diberi raban gerempung sereta madahka nya amat konstruktif sereta mantu opis menteri nagang sebarang peniki rega ke enda patut. — DayakDaily