Hishamuddin temegah enggau gempung, penyerakup BN Sarawak

Datuk Seri Hishammuddin Tun Hussein

KUCHING, April 9: Menteri Ngetanka Menua Datuk Seri Hishammuddin Tun Hussein, temegah enggau gempung sereta penyerakup Barisan Nasional (BN) negeri ti diiring Kepala Menteri Sarawak, Datuk Patinggi Abang Johari Tun Openg.

Ku iya, taja pan gaya politik nyerumba pengawa bepilih besai ke-14 di Sarawak enda serichah baka di Semenanjung ba ke diatu, tang iya pechaya parti di negeri tu meretika kuing BN ti seati.

“Tu nyata dipeda lebuh semua parti komponen meretika kuing kitai, kitai dalam kapal ke sama ke udah mudah digaga kitai.

“Taja pan enda serichah baka ke dikearapka, ke pemadu beguna kitai beserakup. Nadai guna richah semenua tang pengidup kitai tegadai,” ku iya ba aum media pengudah bejadi ‘Jelajah Perkasa Perwira’ Kuching Divisyen 1 ba Kem Muara Tuang ditu sehari tu.

Ku Hishammuddin, struktur enggau perambu di negeri tu mega ngemegahka ati laban adai penyerekang penemu entara parti komponen lebuh mantaika chalun diri.

“Aku meda kediri empu maya Pengawa Bepilih Kunsil Negeri Ke-11 (PRN 11) sebedau tu lalu aku ngarapka ba PRU14 mega mengkang ngembuan penaluk ke sebaka,” ku iya.

Iya ngarika ketuai tetinghi BN mantaika pengaga ati sereta lantang seput meda gaya politik ke manah di negeri tu. — DayakDaily