SELANGAU, Feb 9: Pengawa ngiga orang ke tasah ampuh bah deka dipejalai enggaika bisi sekda nya dipelaba agi tepekul ba rumah panjai sida di pelilih Selangau.
Menteri ba Opis Menteri Besai Datuk Joseph Entulu Belaun madahka pengawa nya deka dipejalai nguna helikopter ari langit.
Orang ke tasah nya engka agi tepekul laban jalai nuju rumah panjai sida diampuh ai.
“Maya ke ninjau, aku deka mai bekal pemakai ngambika diberi ngaga peranak ke tasah nya,” ku iya.
Iya bejaku munyi nya ngagai pemberita pengudah ngabas Palan Ngenduh Sementara ampuh bah di Sekolah Jenis Kebangsaan Cina Tong Ah ditu kemari.
Entulu ke mega MP Selangau madahka ejwnsi ke bekaul benung nentuka penyampau orang ke tasah ti patut nerima bantu duit pengasih RM500 ke tetiap ruang bilik.
Ku iya, bantu nya deka diagih enggau naka pengelengkas pengudah ampuh bah surut dikena ngelempungka tating sida ke tasah ti udah rugi sereta rusak reta.
Iya mega minta sida ti enda dipindah ngagai palan ngenduh ngambil gambar bekau ampuh nya ba papan ruai rumah panjai sida naka paras ke ampuh ai lalu ngeripot nya ngagai opis pelilih menua ngambika atur ke patut dipejalaika. — DayakDaily
