ENTIKONG, Jun 17: Panglima Divisyen Pertama Infantri Malaysia, Mejar Jeneral Toh Choon Siang, madahka nadai sebarang penyadi ti enda manah sekumbang musim pengerami ke diintu ba sepemanjai garis entara negeri Sarawak enggau Indonesia.
Ku iya, dikena nentuka pengelikun ba sepemanjai garis entara kededua buah menua, Op Keris Parang udah diaktifka iya nya kerejasama entara TDM enggau TNI-AD.
“Kami bejalaika pengawa matai begulai sepemanjai garus entara menua,” ku iya.
Kelimpah ari nya ku iya, beberapa pos pengelikun udah diaktifka sepemanjai taun tu nengah kerejasam enggau Soldadu Nasional Indonesia, lalu pengering kitai chukup dikena nyaga pengelikun ba garis entara menua nya.
Iya mega madah, fokus diatu iya nya nyeliahka ulah mai barang ke bisi sabsidi pansut belalai ari nengeri tu baka minyak enggau sekeda barang ke bukai.
Iya madah munyi nya lebuh ke ngabas palan Operasi Awas Keris Parang a Pos Kotis Entikong, seraya begulai enggau raban soldadu ke gawa kelimpah nyuaka pemeri Hari Raya ngagai pegawai enggau raban soldadu.
Penatai Choon Siang disambut Brig Jen TNI Bambang Ismawan, Dankolakopsrem 121/ABW enggau Brig Jen Mohd Bustaman Mat Zin, Panglima 3 Bgd sereta pegawai enggau raban Soldadu Darat Malaysia (TDM) enggau raban Tentera Nasional Indonesia Angkatan Darat (TNI-AD).
Ngena awak nya mega, Panglima 1 Divisyen bisi ngabas sereta begulai enggau pegawai sereta raban soldadu ba beberapa Pos Operasi Awas Keris Parang ke bukai. — DayakDaily
