SRI AMAN, Dis 23: Opis Dagang Betanam Betupi Perintah Besai (FAMA) deka meli 100 tan metrik buah rambutan ari pekebun di menua tu, taun tu.
Buah nya deka dikelalu ari baruh program GPL FAMA ke deka digred, dibungkus sereta diberi label lalu dijual ngagai menua Eropah, Timur Tengah, Semenanjung Malaysia, Sabah nyengkaum Sarawak empu.
Ari 100 tan metrik nya, 12 tan metrik deka dieksport ke Dubai enggau Belanda.
Sapit Menteri Betanam Betupi enggau Industri Bepelasarka Agro, Datuk Anthony Nogeh udah bejadika ‘Touch Point Programme’ dikena nyendiaka diri deka eksport buah rambutan nya ke Eropah enggau Timur Tengah ba Rumah Nimong Empelajau ditu kemari, madahka FAMA ngemeratka kualiti buah rambutan ba raban pekebun buah nya.
“Enti pekebun ulih ngemansutka produk ti tinggi kualiti, produk nya ulih diangkat nyadi produk premium lalu ulih dieksport ngagai makit entarabansa,” ku iya.
Ku Nogeh, projek nya dipasuk 55 iku pesereta ti nguna 48 hektar tanah.
Iya mega madahka FAMA Sarawak udah ngekport buah rambutan nya ke Semenanjung Malaysia ke nyau ari taun 2008 lalu ngagai Dubai kenyau ari taun 2015.
“Keterubah endar buah rambutan nya dieksport ke Dubai enggau Eropah iya nya kena 15 Januari taun 2015, ke alai maya nya 800 kg dibai ke Dubai lalu 900 kg udah dianjung ke menua Belanda,” ku iya.
Ari tau 2008 nyentuk ke Disember 2016, FAMA udah meli 250,587 kg Rambutan Anak Sekula tauka R191 ari Sri Aman.
Nogeh mega madahkaperintah udah ngungkupka RM 500 juta ari baruh bajet 2018 dikena nempa pengawa baru nenga Industri Pemakai Agro. — DayakDaily
