77 JKKK nerima geran RM 1.06 juta ari Entulu

Datuk Joseph Entulu Belaun

SELANGAU, Dis 23: Beserimbai enggau Pengerami Ketuai Begulai enggau Rayat ke diatur ba Rumah Lunin, Jalai Selangau – Tatau, Kaban Parlimen Selangau Datuk Joseph Entulu udah nyuaka geran MRP RM 1.06 juta ngagai 77 penerima.

Bala penerima iya nya JKKK rumah panjai enggau Kaunsil Kepala Pengajar Tatau.

Ba pengerami nya mega Entulu bisi nyuaka insentif ngagai 28 iku nembiak ke ulih nampung pelajar sida ngagai renggat degree enggau diploma sereta nembiak ke nyulut ba peresa PT3, ke alai semua penyampau insentif nya bisi RM 21, 160.

Lebuh ke bejaku ba pengerami nya, Entulu ngelalau peranak dalam sitak parlimen Selangau ngambika majak merj sukung penuh ngagai mayuh bengkah projek pemansang rayat.

Ku iya, sukung nya beguna amat ngambika projek ti digaga ulih mujur sereta meri pengelantang ngagai rayat di menua nya.


” Ulah sekeda orang ti sepeneka ati ngubah sesiti peminta ba projek semina deka ngelubahka projek nya dikemendar, lalu nya mega deka meri pengerugi ngagai peranak menua dia,” ku iya.

Iya mega ngelalau bala tuai rumah enggau ketuai gerempung nguna geran ke diberi nya enggau manah.

Sama bisi ngulu pengerami nya Datin Jacklyn Anthony, Sekretari Politik Kepala Menteri Adriana Chumang, Sekretari Peribit Menteri Ba Opis Menteri Besai, Bayang Ringkat, Penghulu Richard Empaling, Penghulu Boniface Siew, Penghulu Sylvester Salang enggau 118 iku tuai rumah. — DayakDaily