KUCHING, Jun 11: RM91 juta duit Gerempung Main Bol Sarawak (FAS) udah dilesapkan siku orang, pia ku Presiden FAS, Datuk Posa Majais sehari tu.
Pengawa mantaika nya nyadi skandal pemadu besai dalam sejarah limba enggau main Negeri Sarawak.
Iya minta ‘orang nya’ badu nguna nama FAS ke pemaik diri empu aja.
Posa madahka bisi bukti tegap bekaul pekara nya.
“Aku nadai pilih bukai kelimpah mantaika orang nya.
“Tu laban deka nyaga imej enggau nama FAS,” ku iya nyemetak seraya madahka pekara nya deka dikenatai ngagai Opis Nagang Ulah Makai Suap Malaysia (SPRM).
“Ketuka ulah (salah nguna nama FAS). Padahka penunga penyampau duit RM91 juta nya ke diulih kenyau ari taun 2015 ngagai 2016,” padah iya nyemetak.
Posa madah, kesemua duit nya diulih ngena nama FAS.
Ku iya, piak sida mega ngembuan rekod transaksi bayar ngagai FAS ke digaga sekeda piak.
Sedarka ulah nya deka meri pengirau ngagai piak nya, Posa bekeras madahka singkang ngenyit nya dikena ngetanka FAS nyadi gempung besai main bol ke beintegriti. — DayakDaily
