Cobbold John: 18 kriteria chalun deka nentuka PBDSB tegap napi PRN12

Cobbold John

KUCHING, Dis 17: Parti Bansa Dayak Sarawak Baru (PBDSB) netapka 18 kriteria ke patut dikembuan chalun ngarika parti dikena napi Pengawa Bepilih Besai Negeri Ke-12 (PRN12).

Presiden PBDSB Cobbold John Lusoi madah kriteria nya berat ngambika parti tau dipeda tegap ba ati rayat kelebih agi ba bala pengundi.

Netapka PBDSB mai agenda negika hak Dayak ari genap sukut, Cobbold madah kesemua 18 kriteria nya deka nentuka chalun siku orang ke ulih nyadi ketuai.

“Ba PRN12 tu, kitai pechaya nerima sukung ari pengundi Dayak kelebih agi ari raban nembiak.

“Ketegal nya, PBDSB meseti diarika chalun ke ngembuan penegap ari genap sukut alai 18 kriteria udah ditetap ungkup tuju nya.

“Kriteria nya ulih mandangka PBDSB nyadi sebengkah parti ti negika hak, pemaik sereta pengelantang Dayak,” ku Cobbold lebuh dirandau Dayakdaily sehari tu.

Nitihka penerang Cobbold, 18 kriteria nya disetuju ba randau-Aum Besai Dayak ti diarika raban intelektual Dayak ke mega sida ke mayuh peneleba ba pekara politik Sarawak.

Entara sekeda kriteria ku Cobbold, chalun meseti landik ba pekara adat enggau basa Iban, landik ba main asal Iban, ngembuan degree sereta landik bejaku Iban.

“Chalun mega meseti nemu asal penatai Iban, enda bedanji sengapa enti nya asai ke enda ulih, enda bejaku bula sereta sekeda ke bukai,’ku Cobbold nambah.

Dulu agi ari tu, Cobbold udah netapka parti deka nyabung chalun ba 36 sitak kunsil negeri ke majoriti diwan pengundi Dayak.

Diatu ku iya, PBDSB udah tetemuka 30 chalun potensyel alai semua chalun nya nitihka 18 kriteria ke ditetap.

“Enam iku agi chalun ngarika parti asai aku enda tusah digiga, kitai mengkang bisi timpuh ke panjai sebedau PRN12.

“Diatu kitai bisi peluang, alai GPS enggau PH sama bela berebut deka matak ati pengundi, bansa Dayak patut nyukung parti Dayak dikena nentu hak enggau pemaik diintu manah.

“Sapa agi ke ulih negika hak kitai Dayak enti ukai ketuai ari parti Dayak empu,” tandu Cobbold.

Ngenang kaul ke sama, Cobbold pechaya PRN12 deka diadu nitihka timpuh iya nya ba taun 2021.

Iya nyangkal tuduh pengawa bepilih nya deka diadu tumu.

Tajapia iya madah PBDSB diatu udah berengkah nyikap diri nengah strateji ke ditusun nyentuk ngagai maya bepilih.

Ungkup PRN12 ti deka datai,Cobbold netapka diri ngining sitak kunsil Simanggang alai iya pechaya sitak nya bela deka dikerebut chalun ari PH ti nguji ngerampas ari GPS.

PH ku Cobbold engka deka nyabung mandal presiden DAP Leon Jimat Donald alai GPS engka mengkang nyabung penyandang ari SUPP Datuk Francis Harden.

Ba sentang jaku ansak Chairman PKR Sarawak Baru Bian ti dekaka kaban parti ngadu gempung rat ngambi ulih ngalahka GPS, Cobbold ngasai PKR diatu udah pambar.

Iya pechaya atur nerima MP Julau Larry Sng dalam PKR udah ngujungka PKR Sarawak pambar dua. — DayakDaily