KUCHING, Dis 20: Ujan bangat enggau ai pasang kenyau ari demalam, uah ngujungka sekeda kandang endur di bagi menua Miri, Bintulu enggau Limbang ampuh bah pagi tu.
Tukang pengerembai berita Opis Bomba enggau Penyah Penusah madah, kelimpah tiga bagia menua nya, peranak di bagi menua bukai di negeri tu mega dipinta bejejaga enggaika dituntung penusah ampuh bah, beduduk ari gaya hari ti enda meruan diatu.
Ku iya, di Bintulu, bisi 22 iku tasah ari lima buah ruang bilik ba Kpg Sebuan Besar, Jepak dipindah ngagai palan ngenduh ba Dewan Mayuhguna BDA dah bekau rumah sida ampuh bah.
“Di Kpg Batu 1, Kuala Baram di Miri, orang berikan mindahka perau sida ngagai tisi jalai enggaika dianyut ke umbak, lalu ai pasang nya mega mai luchak ti ngujungka raban penyelamat bejalaika pengawa meresi” ku iya lebuh dikerandau ditu pagi tu.
Iya mega madah, naka ke diatu peranak Limbang pemadu mayuh tasah ketegal ampuh bah, tanah tusur enggau pun kayu tumbang,
Ku iya, Balai Bomba enggau Penyelamat (BBP) Limbang udah nerima kangau ti madahka tanah tusur panggilan di Kpg Bakol enggau pun kayu tumbang di Kpg Malaganggai.
Ku iya, tujuh kandang endur iya nya Kpg Tegarai, Kpg Tabahan, Kpg Pundut, Kpg Berawan, Kpg Sungai Poyan, Sekolah Kebangsaan (SK) Ulu Lubai enggau Kpg Sembiling ke ampuh bah.
“Berebak enggau nya jalai nuju ke Rumah Panjai (RH) Assan, RH Lucy, RH Tan enggau SK Bukit Batu mega ampuh sereta enda ulih ditengah kerita.
“Bisi sekeda rumah panjai ampuh bah lalu palan endur ngenduh deka dibuka sebarang maya,” ku iya. — DayakDaily
