Bernama, RTM dipinta nyerahka keretas perambu ngempung kededua organisasi

Gambar hiasan seorang kanak-kanak menonton tv. — DayakDaily.com file pic. // Photo: Pixabay

KUALA LUMPUR, Julai 13: Bernama enggau RTM dipinta nyerahka keretas kereja perambu ngempung kedua-dua organisasi nya nyerumba ujung bulan tu, sebedau pemutus ke penudi digaga ba awak ke semak, pia ku Menteri Komunikasi enggau Multimedia Gobind Singh Deo.

Madahka pengawa ngempung nya ‘kompleks’, taja pia iya deka nentuka semua pekara berat entara penyampau pekereja, ungkus enggau chanel berita deka diserenih silik dulu sebedau sebarang pemutus digaga.

“Ambika chunto enti kitai bisi gempung nya, sapa megai tanggungpengawa ngumpul penerang ari sukut berita, sapa ke megai tanggungpengawa ari sukut memproses berita ke deka ditayangka.”

“Nya mega ngaul pekara enti kitai bisi lebih orang gawa, lalu nya siti pekara berat ba aku,” ku iya pengudah ngabas palan pemansang Media City, ditu ensana.

Sama bisi enggau Ketuai Pemesai Eksekutif Bernama Datuk Zulkefli Salleh, Sapit Ketuai Direktor Penyiaran Strategik RTM Abdul Muis Sheffi enggau Direktor Urusan Kumpulan DRB-HICOM Berhad Datuk Seri Syed Faisal Albar.

Gobind mega madah, naka perambu ngempung nya ti udah dibantaika ujung bulan nyin tadi, sekeda randau sentang nya udah dipejalaika, ke alai kedua-dua entiti media ari baruh pegai Opis Menteri Komunikasi enggau Multimedia nya mantaika mayuhbperambu ke manah.

Iya pechaya gempung nya ke dianggap deka nempa siti ‘Dapur Media’, ulih melanja mayuh agi puku ungkup isi utai ke dibantai ngena laluh wang turu asil ari bekelimat.

Dulu ari nya, iya diberi penerang sentang status ngaga Media City, madahka renggat keterubah ari tiga renggat ngaul pengawa ngaga ubah ba bangunan ke bisi diatu ti disadang tembu endar September tu.

Ungkup renggat kedua ngaul pengawa ke sebaka enggau renggat keterubah ke disadang tembu digaga kena bulan Jun taun baru lalu renggat ketiga ngaul pengawa ngaga lalu nyikap perengka baru ke disadang tembu ba bulan Jun 2020.

“Aku fipadah ke alai ungkus ke diatu chukup ungkup pengawa ngaga lalu sida mega madahka engka dioeaba tumu tembu ari ke dipelin,” ku iya.

Media City diperambu perintah ba taun 2009, digaga di atas tanah pemesai 27.11 hektar di Angkasapuri ngena ungkus belanja RM860 juta. — DayakDaily