PUTRAJAYA, Jun 29: Bup teks enggau aktiviti semina meri 28 peratus pemerat ngagai beg sekula nembiak primari, pia ku Pansik Berat Beg Nembiak Sekula Primari 2017.
Pansik nya mega tetemuka, berat beg sekula nya lebih berat ketegal rengka nulis, bup kereja peribit, uniform sekula agama tauka kurikulum, bekal pemakai enggau ai irup, gajet sereta beg nya empu.
Menteri Pelajar Maszlee Malik madahka Opis Menteri Pelajar udah ngaga strategi mutarka isu beg berat nengah chara bejalaika sekeda atur nyengkaum ngaga garis lalau sereta perambu ngagai bala nembiak, apai indai, sekula enggau pengajar.
Ku iya, opis menteri nya merambu gambika sekula nusun jam belajar ngagai tiga nyemtuk empat mata pelajar tiap hari, kelimpah semua aktiviti meseti ditembuka dalam kelas tauka ditampung ba kelas ti nangkanka nya ngambika ulih ngurangka mai pulai kereja rumah.
Bejaku ba aum media di opis menteri nya ditu kemari, iya madahka pengajar meseti nitihka Surat Tesau (surat tesau berkaul enggau bup kereja/jadual anjal) kelimpah meri perintah ke nyata ngagai nembiak sentang nama ke patut dibai ke kelas tiap hari. — DayakDaily
